اعراض واسباب خلع المفصل عند الرضع

ملاحظة : الفيديو ادناه لتوضيح الفكرة فقط،  لا انصح ان يسوي اي احد لطفله ، والممرضة الظاهرة في المقطع خبيرة وتعرف شدتسوي،

الطفل الممتون ،

عبارة نسمعها يوميا من الاهل

طفل عمره ايام او اشهر ، يعاني من بكاء متواصل

التشخيص الاول والاوحد في ذهن الاهل هو " الطفل ممتون " ويقصدون بيها انه احد من الاهل او الاقارب شال الطفل بطريقة خاطئة او سوى حركة مو صحيحة وتسبب بمتن ( خلع كتف ) الطفل ، وغالبا يكون الاب المسكين هو الملام والمتهم الاول رغم انه حمل طفله لمدة ثانيتين 

بعدها يكومون الاهل ياخذون الطفل لأحدى النساء العارفات ، اللي راح تخلي الطفل كدامهه وتصف رجليه وحدة بصف الثانية ، وترفع راسهه بنظرة مليئة باللوم والتقريع للأهل ، وتكوللهم ( رجليه ما متساويات ، ابنكم كلش ممتون ، بس بسيطة ان شاء الله ، هسه امتنه ويصير زين ) وتبدي تسوي حركات بأيدين ورجلين الطفل لعدة دقائق ، 

احيانا الطفل فعلا يرتاح بعد هذا الاجراء ، وهاي الراحة ممكن تستمر لفترة قصيرة او طويلة 

واحيانا ماكو اي فائدة ويظل الطفل يبجي بشكل متواصل

بالحقيقة ، شغلة الطفل الممتون ما الها وجود بأي مكان بالعالم ، بس بالعراق ، وما الها أي اساس طبي ، وخلع الكتف يحتاجله اصابة او شدة قوية جدا حتى يصير ، مو مجرد حركة بسيطة او حمل الطفل بشكل خاطئ

زين ليش الطفل يبجي بهالشكل ، وليش المرية العارفة من تمتنه ، يرتاح ويسكت ولو مؤقتا ؟

هواي الاسباب اللي تخلي الطفل يبجي بصورة متواصلة ، اكثرها شيوعا هو المغص ، ولا تستهينون ابدا بالالم الناتج عن المغص ، 

هواي اطفال يعانون من المغص المعوي اللي ممكن يكون متقطع او مستمر ، واحيانا ما يستجيب لأفضل العلاجات الموجودة حتى اللي يوصفوها الاطباء ، وغالبا يستمر الموضوع الى ان يتجاوز الطفل عمر 6 شهور او اكثر ، حتى تبدي تخف نوبات المغص عنده ، 

زين ليش الطفل هدأ وسكت لمن متنته العارفة ؟

الجواب هو : جزء من علاج الآلام عند الرضع وحديثي الولادة ، وخصوصا الم المغص ، هو المساج ، نعم ، واكو هواي فيديوات على اليوتيوب تشرح طرق المساج لتخفيف المغص او الانتفاخ الناتج عن الغازات ، والحركات اللي تسويها العارفة تشبه الى حد كبير ، حركات المساج

والطفل عموما ، حاله حال الانسان البالغ ، لمن تسويله مساج ، راح يشعر براحة ويسترخي وممكن حتى ينام 

السؤال هنا : ليش الطفل العراقي بس تحركه ، ينمتن ؟ بينما الطفل بالفيديو ادناه ، كلشي ما بي رغم الممرضة لعبت بي طوبة !!!

ملاحظة : مو قصدي تروحون تسوون لأطفالكم مثل الفيديو ، لكن لتقريب الفكرة للأذهان

https://www.facebook.com/100001889096999/posts/7368254499914113/